അയ്യപ്പനല്ല ഭക്തരാണ് ആത്മനിയന്ത്രണം പോകാതെ നോക്കേണ്ടതെന്ന് സുഗതകുമാരി

തിരുവനന്തപുരം: സ്ത്രീകളെ കണ്ടാൽ ശബരിമല അയ്യപ്പന്റെ  ബ്രഹ്മചര്യം നഷ്ടപ്പെടുമെന്നും അയ്യപ്പന് ആത്മ നിയന്ത്രണം ഇല്ലാതാകുമെന്ന്‌ പറയുന്നത് വിഡ‌്ഢിത്തമാണെന്ന്‌ കവിയത്രി സുഗതകുമാരി. അയ്യപ്പനല്ല ഭക്തരാണ് ആത്മനിയന്ത്രണം പോകാതെ നോക്കേണ്ടതെന്നും സുഗതകുമാരി പറഞ്ഞു. ശാന്തി സമിതിയുടെ ആഭിമുഖ്യത്തിൽ  തിരുവനന്തപുരത്ത‌് ചേർന്ന  യോഗത്തിൽ സംസാരിക്കുകയായിരുന്നു അവർ.

അയ്യപ്പനെ കാണണമെന്ന‌് നിർബന്ധമുള്ള  ഭക്തരായ സ്ത്രീകൾക്ക‌് ശബരിമലയിൽ പ്രവേശനം നൽകാൻ നാം തയ്യാറാകണം. ശബരിമല ഒരു ചെറിയ വനഭൂമിയാണ് അത് സംരക്ഷിക്കണമെങ്കിൽ നിയന്ത്രണം എല്ലാവർക്കും വേണം. അതുപോലെ കോടതി വിധി മാനിക്കണം. എന്നാൽ ഒരു വലിയ ജനവിഭാഗത്തിന്റെ വിശ്വാസ പ്രശ്നംകൂടിയായതിനാൽ ധൃതിപിടിച്ചു നടപ്പിലാക്കാൻ ശ്രമിക്കരുത്. പരസ്പരം പോരടിക്കാതെ സർക്കാരും വിശ്വാസി സമൂഹവും വിട്ടുവീഴ്ചയ്ക്ക് തയ്യാറാകണം. ശബരിമല ഒരിക്കലുമൊരു യുദ്ധക്കളമാക്കരുതെന്നും സുഗതകുമാരി പറഞ്ഞു.