വീണ്ടും എ.ടി.എം കവർച്ചാശ്രമം: ചാവക്കാട് എസ്.ബി.ഐ എ.ടി.എം തകർത്ത നിലയിൽ

തൃശൂർ: ചാവക്കാട് എസ്.ബി.ഐ എ.ടി.എം തകർത്ത നിലയിൽ കണ്ടെത്തി. കടപ്പുറം അഞ്ചങ്ങാടിയിലുള്ള എസ്.ബി.ഐയുടെ എ.ടി.എമ്മാണ് മോഷ്ടാവ് തകർത്തത്. പണം നഷ്ടപെട്ടോ എന്ന് വ്യക്തമല്ല. പോലിസ് സ്ഥലത്ത് എത്തി അന്വേഷണം ആരംഭിച്ചു. ഇന്ന് രാവിലെയാണ് എ.ടി.എം തകർത്തനിലയിൽ കണ്ടെത്തിയത്‌. രാവിലെ പണം പിൻവലിക്കാനെത്തിയ ആളാണ് എ.ടി.എം തകർന്ന നിലയിൽ കണ്ടെത്തിയത്. ഉടൻ തന്നെ ബാങ്കിലെ ഉദ്യോഗസ്ഥരെ വിവരം അറിയിക്കുകയായിരുന്നു. തുടർന്ന് പൊലീസും ബാങ്കിന്റെ ഉന്നത ഉദ്യോഗസ്ഥരും സ്ഥലത്തെത്തി പരിശോധന നടത്തി.

ഈ മാസം 12ന് സൗത്ത് ഇന്ത്യൻ ബാങ്കിന്റെ കൊരട്ടിയിലെ എ.ടി.എം ഗ്യാസ് കട്ടർ ഉപയോഗിച്ച് തകർത്ത് 10.8 ലക്ഷം രൂപ കവർന്നിരുന്നു,​ ബാങ്കിന്റെ വരാന്തയിൽ ഘടിപ്പിച്ചിരിക്കുന്ന നിരീക്ഷണ കാമറയും സ്‌പ്രേ പെയിന്റടിച്ച് പ്രവർത്തന രഹിതമാക്കിയ ശേഷമായിരുന്നു കവർച്ച നടത്തിയത്.