കിടപ്പറയില്‍വച്ച് കടന്നു പിടിച്ചു, ചുംബിച്ചു: മീ ടൂവില്‍ കുടുങ്ങി രാഹുല്‍ ഈശ്വർ

തിരുവനന്തപുരം: രാഹുല്‍ ഈശ്വറിനെതിരെ മീ ടൂ ആരോപണവുമായി യുവതി രംഗത്ത്. ആക്ടിവിസ്റ്റ് ഇഞ്ചിപ്പെണ്ണ് തന്റെ ഫേസ്ബുക്ക് പ്രൊഫൈലിലൂടെയാണ് സുഹൃത്തും ആര്‍ട്ടിസ്റ്റുമായ യുവതിയുടെ ദുരനുഭവം പങ്കുവെച്ചിരിക്കുന്നത്. യുവതിയുടെ വാട്സ്ആപ്പ് സന്ദേശത്തിന്‍റെ സ്ക്രീന്‍ഷോട്ട് സഹിതമാണ് ഇഞ്ചിപ്പെണ്ണ് ഫേസ്ബുക്കില്‍ പോസ്റ്റ് ചെയ്തിരിക്കുന്നത്.

രാഹുല്‍ ഈശ്വര്‍ വീട്ടിലേക്ക് ക്ഷണിച്ച് വരുത്തി ലൈംഗിക ബന്ധത്തിന് നിര്‍ബന്ധിച്ചുവെന്നാണ് ആരോപണം. ടിവിയില്‍ സോഫ്റ്റ് പോണ്‍ വീഡിയോ പ്രദര്‍ശിപ്പിച്ച രാഹുല്‍ കിടപ്പറയില്‍ വച്ച് തന്നെ കടന്ന് പിടിച്ച് ചുംബിച്ചുവെന്നും കുതറി മാറിയെങ്കിലും അയാള്‍ പലതവണ ഇത് ആവര്‍ത്തിച്ചുവെന്നും യുവതി പറയുന്നു.

പ്ലസ് ടു വിദ്യാഭ്യാസം പൂര്‍ത്തിയായിരിക്കെ 2003-2004 കാലഘട്ടത്തിലാണ് സംഭവം. വീട്ടില്‍ അമ്മയുണ്ടെന്നും സംസാരിക്കാമെന്നും പറഞ്ഞ് സുഹൃത്തായിരുന്ന രാഹുല്‍ തന്നെ വീട്ടിലേക്ക് ക്ഷണിച്ചു. എന്നാല്‍ വീട്ടില്‍ ആരുമുണ്ടായിരുന്നില്ല. ടിവിയില്‍ അയാള്‍ സോഫ്റ്റ് പോണ്‍ സിനിമ പ്രദര്‍ശിപ്പിച്ചു. പിന്നീട് അയാള്‍ തന്‍റെ കിടപ്പറ കാണിച്ചു തന്നു. അവിടെ വച്ച് തന്നെ സ്പര്‍ശിക്കുകയും ചുംബിക്കുകയും ചെയ്തു.  രക്ഷപെടാന്‍ ശ്രമിച്ചുവെങ്കിലും പല തവണ ഇത് തുടര്‍ന്നു.  ആ വീട്ടില്‍ കുടുങ്ങിപ്പോയെന്ന് കരുതി. പിന്നീട് അവിടെനിന്നും രക്ഷപെടുകയായിരുന്നുവെന്നും യുവതി വ്യക്തമാക്കി.

ഇന്ന് രാഹുലിനെ എല്ലായിടത്തും കാണുമ്പോള്‍ എന്‍റെ ഉള്ളില്‍ പഴയ ഓര്‍മ്മകളെല്ലാം കടന്നു വരികയാണ്. അയാളുടെ വിശ്വാസങ്ങളില്‍ എനിക്ക് സംശയമുണ്ടെന്നും  യുവതി പറയുന്നു.

ഇഞ്ചിപ്പെണ്ണിന്‍റെ ഫേസ്ബുക്ക് പോസ്റ്റ്