ശബരിമല ആക്രമണം: ഇതുവരെ അറസ്റ്റിലായത് 2825 പേർ

തിരുവനന്തപുരം: ശബരിമല സ്ത്രീ പ്രവേശനവുമായി ബന്ധപ്പെട്ട് നിലയ്ക്കലും പമ്പയിലും യുവതികളെ തടഞ്ഞുള്ള പ്രതിഷേധത്തിൽ ഇതുവരെ 2825 അറസ്റ്റ് ചെയ്തു. ശബരിമല സംഘർഷവുമായി ബന്ധപ്പെട്ട് 452 കേസുകൾ രജിസ്റ്റർ ചെയ്തതായി പൊലീസ് അറിയിച്ചു. അതേസമയം അക്രമ സംഭവങ്ങളിൽ നേരിട്ട് ബന്ധമുള്ളവർക്കെതിരെ മാത്രം ജാമ്യമില്ലാ വകുപ്പ് ചുമത്തിയാൽ മതിയെന്നും നാമജപ യാത്രയിൽ പങ്കെടുത്ത സ്ത്രീകൾക്കെതിരെ നടപടി വേണ്ടെന്നും ഡിജിപി ലോക്‌നാഥ് പൊലിസിന് നിർദേശം നല്കി.

തുലാമാസപൂജ സമയത്തുണ്ടായ അതിക്രമങ്ങൾ മണ്ഡലകാലത്ത് ആവർത്തിക്കാതിരിക്കാനുള്ള മുന്നറിയിപ്പെന്ന നിലയിൽ പരമാവധി പേരെ അറസ്റ്റ് ചെയ്യുകയെന്ന നിർദേശമാണ് ഡി.ജി.പി നൽകിയിരിക്കുന്നത്. അക്രമങ്ങളിൽ നേരിട്ട് പങ്കെടുത്തതായി വീഡിയോ ദൃശ്യങ്ങളിൽ നിന്ന് തിരിച്ചറിഞ്ഞവരുടെ അറസ്റ്റ് തുടരുകയാണ്.