ശബരിമല സ്ത്രീപ്രവേശനം ; 24 മണിക്കൂർ ഹർത്താലിന് ആഹ്വാനം ചെയ്ത് സംരക്ഷണസമിതി

പത്തനംതിട്ട: സ്ത്രീപ്രവേശന വിധിയിൽ പ്രതിഷേധിച്ച് ഹർത്താലിന് ആഹ്വാനം ചെയ്ത് ശബരിമല സംരക്ഷണസമിതി. 24 മണിക്കൂർ ഹർത്താലിനാണ് സംരക്ഷണസമിതി ആഹ്വാനം ചെയ്തിരിക്കുന്നത്. ഇന്ന് രാത്രി 12 മണി മുതൽ പ്രവീൺ തൊഗാഡിയ അധ്യക്ഷനായ അന്താരാഷ്ട്ര ഹിന്ദു പരിക്ഷത്ത് ഹർത്താലിന് പിന്തുണ പ്രഖ്യാപിച്ചിട്ടുണ്ട്.

തുലാമാസ പൂജകൾക്കായി ശബരിമല നട തുറക്കാൻ മണിക്കൂറുകൾ ബാക്കി നിൽക്കേ ശബരിമല കേന്ദ്രീകരിച്ച് ശക്തമായ സമരമാണ് ശബരിമല സംരക്ഷണസമിതി നടത്തുന്നത്. ബുധനാഴ്ച്ച പുലർച്ചെ മുതൽ സമരക്കാരും പൊലീസും തമ്മിൽ പലതവണ ഏറ്റുമുട്ടി. സമരപന്തൽ പൊളിച്ച് നീക്കിയ പൊലീസ് പ്രക്ഷോഭകർക്ക് നേരെ ലാത്തി വീശി. ആരെയും നിയമം കയ്യിലെടുക്കാൻ അനുവദിക്കില്ലെന്നും ഒറ്റപ്പെട്ട അക്രമസംഭവങ്ങൾക്ക് സാധ്യതയുണ്ടെന്നും ഡിജിപി വ്യക്തമാക്കി.