ജോലിയില്‍ നിന്ന് വിരമിച്ച വിദേശികള്‍ക്ക് ഇനി യുഎഇയില്‍ സ്ഥിര താമസം തുടരാം

ദുബായ് : യുഎഇയി ജോലിയില്‍ നിന്ന് വിരമിച്ച മലയാളികള്‍ ഉള്‍പ്പടെയുള്ള വിദേശികള്‍ക്ക് ഇനി രാജ്യത്ത് സ്ഥിര താമസം തുടരാനാകും. ഇതുസംബന്ധിച്ച പുതിയ നിയമത്തിന്, യുഎഇ മന്ത്രിസഭ അനുമതി നല്‍കി. യുഎഇ-യുടെ സമ്പദ്‌വ്യവസ്ഥയ്ക്ക് വലിയ മുതല്‍ക്കൂട്ട് ആകുന്ന സുപ്രധാന പ്രഖ്യാപനമാണ് ഇതെന്ന് വിലയിരത്തപ്പെടുന്നു.

യുഎഇ വൈസ് പ്രസിഡന്‍റും പ്രധാനമന്ത്രിയും ദുബായ് ഭരണാധികാരിയുമായ ഷെയ്ഖ് മുഹമ്മദ് ബിന്‍ റാഷിദ് അല്‍ മക്തൂം ആണ് ഇക്കാര്യം പ്രഖ്യാപിച്ചത്. ഞായറാഴ്ച ചേർന്ന മന്ത്രിസഭാ യോഗമാണ് ഇത് സംബന്ധിച്ച് തീരുമാനമെടുത്തത്. 55 വയസിനു ശേഷം വിരമിക്കുന്ന പ്രവാസികൾക്ക് അടുത്ത അഞ്ച് വർഷത്തേക്ക് രാജ്യത്ത് തങ്ങാൻ പ്രത്യേക വീസ അനുവദിക്കാനാണ് തീരുമാനമായത്. പ്രത്യേക വീസ ലഭിക്കുന്നതിന് മൂന്നു നിർദേശങ്ങളും വച്ചിട്ടുണ്ട്. രാജ്യത്ത് 20 ലക്ഷം ദിര്‍ഹത്തിന് തുല്യമായ നിക്ഷേപമുണ്ടായിരിക്കണം. അല്ലെങ്കില്‍ 10 ലക്ഷം ദിര്‍ഹത്തില്‍ കുറയാത്ത സമ്പാദ്യം ഉണ്ടായിരിക്കണം. അതുമല്ലെങ്കില്‍ പ്രതിമാസം 20,000 ദിര്‍ഹത്തില്‍ കുറയാത്ത സ്ഥിര വരുമാനമുണ്ടാകണം.