അമ്മയും മകനും 68 വർഷങ്ങൾക്ക് ശേഷം കണ്ടുമുട്ടി

യോംഗ്‌യാംഗ്: 68 വർഷങ്ങൾക്ക് ശേഷം ഒരു അമ്മയും മകനും കണ്ടുമുട്ടിയാൽ എങ്ങനെയുണ്ടാകും! ഹൃദയസ്പർശിയായ ഒരു കാഴ്ചയാവും അത്. ഉത്തര കൊറിയയിലെ ഒരു റിസോർട്ടാണ് ഇത്തരമൊരു അപൂർവ ഒത്തൊരുമിക്കലിന് വേദിയായത്. കൊറിയൻ യുദ്ധത്തിൽ അമ്മ ഉത്തര കൊറിയയിലും മകൻ ദക്ഷിണ കൊറിയയിലുമായിപ്പോയി. അന്ന് നാല് വയസുകാരനായിരുന്ന ലീക്ക് ഇപ്പോൾ 71 വയസായി, അമ്മ സാംഗ് ചോളിന് 92 വയസും. തൻറെ രണ്ടു മക്കളുമായാണ് ലീ അമ്മയെ കാണാൻ ഉത്തര കൊറിയയിൽ എത്തിയത്.

ഇന്നലെ ഉത്തര കൊറിയയിലെ മൗണ്ട് കുംഗാംഗ് റിസോർട്ടിൽ വച്ചാണ് കൂടിക്കാഴ്ച നടന്നത്. 57,000 പേർ അപേക്ഷിച്ചതിൽ 89 കുടുംബങ്ങൾക്കാണ് ഒത്തൊരുമിക്കലിനുള്ള അനുമതി ലഭിച്ചത്. ഈ വർഷം ആദ്യം ഉത്തര കൊറിയയുടെയും ദക്ഷിണ കൊറിയയുടെയും ഭരണത്തലവന്മാർ നടത്തിയ ചരിത്ര കൂടിക്കാഴ്ചയാണ് ഈ സമാഗമവും സാധ്യമാക്കിയത്.