അതിർത്തിയിൽ ഏറ്റുമുട്ടൽ: നാല് സൈനികർക്ക് വീരമൃത്യു

ശ്രീനഗർ: വടക്കൻ കശ്മീരിലെ ഗുരേഷ് സെക്ടറിൽ ചൊവ്വാഴ്ച രാവിലെ തീവ്രവാദികളുമായുണ്ടായ ഏറ്റുമുട്ടലിൽ ഒരു മേജറടക്കം നാല് സൈനികർ വീരമൃത്യു വരിച്ചു. രണ്ട് തീവ്രവാദികളെ സൈന്യം വധിച്ചു. നുഴഞ്ഞുകയറ്റം തടയുന്നതിനിടെയാണ് ഏറ്റുമുട്ടലുണ്ടായത്. എട്ടു പേരാണ് നുഴഞ്ഞുകയറ്റ സംഘത്തിലുണ്ടയിരുന്നതെന്നാണ് വിവരം.

നിയന്ത്രണ രേഖയിൽ പൊതുവേ സമാധാന മേഖലയായ ഗുരേസ് സെക്ടർ വഴിയാണ് ഇവർ നുഴഞ്ഞുകയറാൻ ശ്രമിച്ചത്. തെരച്ചിലിനിടെ ഇവർ സൈനികർക്ക് നേരെ വെടിയുതിർക്കുകയായിരുന്നു. തിങ്കളാഴ്ച രാത്രിമുതൽ ഈ മേഖലയിൽ പാകിസ്ഥാൻ വെടിനിർത്തൽ ലംഘിച്ചിരുന്നു. നുഴഞ്ഞുകയറ്റക്കാരെ സഹായിക്കാനാണ് ഇതെന്നാണ് വിലയിരുത്തൽ. ഏറ്റുമുട്ടൽ തുടരുകയാണ്.