കുമ്പസാരം ഭരണഘടനാ വിരുദ്ധമല്ലെന്ന് ഹൈക്കോടതി

കൊച്ചി: കുമ്പസാരം ഭരണഘടനാ വിരുദ്ധമായി പ്രഖ്യാപിക്കണമെന്ന് ആവശ്യപ്പെട്ടുള്ള ഹർജി ഹൈക്കോടതി തള്ളി. കുമ്പസാരം സ്വകാര്യതയിലേക്കുള്ള കടന്നുകയറ്റമല്ലെന്നു കോടതി നിരീക്ഷിച്ചു.കുമ്പസരിക്കണമോ വേണ്ടയോ എന്ന് ഒരാളുടെ വ്യക്തിസ്വാതന്ത്ര്യമാണെന്നും നിയമപരമായ നിര്‍ബന്ധമല്ലെന്നും കോടതി വ്യക്തമാക്കി. കുമ്പസരിക്കുമ്പോള്‍ എന്ത് പറയണം, എന്ത് പറയേണ്ട എന്നത് വ്യക്തിക്ക് തീരുമാനിക്കാവുന്നതാണ്. കുമ്പസാരം ഭരണഘടനാ വിരുദ്ധമല്ലെന്നും കോടതി വ്യക്തമാക്കി.

കുമ്പസാരം വ്യക്തിപരമായ പ്രവൃത്തിയായി പ്രഖ്യാപിക്കണമെന്നും നിര്‍ബന്ധിത കുമ്പസാരം ഭരണഘടന നല്‍കുന്ന സ്വകാര്യതയുടെ ലംഘനമാണെന്നും ചൂണ്ടിക്കാട്ടി എറണാകുളം സ്വദേശി സി എസ് ചാക്കോ നല്‍കിയ ഹർജിയാണ് കോടതി തള്ളിയത്. കുമ്പസാരം നടത്താത്ത വിശ്വാസികളുടെ വിശ്വാസപരമായ കാര്യങ്ങള്‍ മതപുരോഹിതര്‍ തടയുകയാണെന്നും ഹർജിക്കാരന്‍ കോടതിയെ അറിയിച്ചിരുന്നു.